Heimspekilegar áskoranir á farsóttartímum

Út er komin, á vegum Siðfræðistofnunar, skýrsla um Heimspekilegar áskoranir á farsóttartímum. Skýrslan er afrakstur rannsóknarverkefnis sem styrkt var af Nýsköpunarsjóði námsmanna og var unnið af fjórum heimspekinemum síðastliðið sumar.

Viðfangsefnið er COVID-19 faraldurinn og viðbrögðin við honum hérlendis, sem skoðuð eru í víðu samhengi en út frá þeim undirsviðum heimspekinnar sem helst snerta á þeim álitamálum sem upp koma, s.s. hagnýtri siðfræði, femínískri heimspeki, stjórnmálaheimspeki og þekkingarfræði/vísindaheimspeki. Í skýrslunni er leitast við að skrásetja þau gögn (eins og viðtöl, fréttaflutning og opinber gögn) þar sem rökstuðningur stjórnvalda fyrir aðgerðum sínum kemur fram. Þegar er til mikið af upplýsingum um þætti tengda COVID-19-faraldrinum og er hætta á að mikilvægar upplýsingar og rökstuðningur aðgerða gleymist í umræðunni þegar fram líða stundir..

Höfundar skýrslunnar eru heimspekinemarnir Ásthildur Gyða Garðarsdóttir, Hörður Brynjar Halldórsson, Victor Karl Magnússon og Vígdís Hafliðadóttir en verkefnið var unnið undir leiðsögn Eyju Margrétar Brynjarsdóttur, prófessors í heimspeki, Finns Dellsén, dósents í heimspeki og Vilhjálms Árnasonar, prófessors í heimspeki.

Niðurstöður rannsóknarinnar verða kynntar á ársfundi Siðfræðistofnunar Háskóla Íslands föstudaginn 15. janúar næstkomandi.

 

Hægt verður að fylgjast með streymi frá fundinum með því að smella á þennan hlekki.

Hér má nálgast skýrsluna á pdf formi.

Þú ert að nota: brimir.rhi.hi.is